現代人的食食愈來愈好，運動的機會煞愈來愈少，致使誠濟人攏有代謝的困擾，尤其是 袂少人對甜路有較興，所以帶腰尺病的人嘛愈來愈濟。 

腰尺是咱人體內底誠重要的器官，伊生做長株型，頭大尾細，腰尺頭和十二指腸倚足近， 尾溜較倚佇脾這搭，中截拄好佇胃的後爿面，所以腰尺若發炎，有的人會疼佇正頂腹， 有的會親像胃咧痛，甚至會痛甲對尻脊骿去，這就是因為腰尺和足濟器官連相倚的關係。 

腰尺是各種消化液產生的所在，遮的酵素會使分解卵白質、醣類佮脂肪，猶有會當中和 胃酸的『bicarbonate sodium』嘛是腰尺所製作出來的。除了分泌消化液，控制血糖的 濃度嘛是腰尺的功能，所以咱人若是定食過量，或者是不時食傷甜的物件，就會共咱腰 尺調節糖分的功能拍歹去，年久月深了後，就有可能會致著糖尿病。 

致著糖尿病毋若是血糖歹控制佮消化不良爾，更加會引起高血壓、心臟病佮腰子病等等 的併發症，所以咱愛定定注意家己的食食，想欲維持身體的健康，就愛保惜家己的腰尺。